सूरदास

सूरसागर

उद्धव मथुरा प्रत्यागमन तथा कृष्ण उद्धव संवाद

ऊधौ जब ब्रज पहुँचे जाइ |
तबकी कथा कृपा करि कहियै, हम सुनिहैं मन लाइ ||
बाबा नंद जसोदा मैया, मिले कौन हित आइ ?
कबहूँ सुरसति करत माखन की, किधौं रहे बिसराइ ||
गोप सखा दधि-भात खात बन, अरु चाखते चखाइ |
गऊ बच्च मुरली सुनि उमड़त , अब जु रहत किहँ भाइ ||
गोपिन गृह ब्यवहार बिसारे, मुख सन्मुख सुख पाइ |
पलक ओट निमि पर अनखातीं, यह दुख कहाँ समाइ ||
एक सखी उनमैं जो राधा, लेति मनहिं जु चुराइ |
सूर स्याम यह बार-बार कहि, मनहिं मन पछिताइ ||166||